အတွေးအခေါ်ပညာ၏ ပြဿနာများ(ဘာသာပြန်) အပိုင်း(၃) (ဘာထရန်ရပ်ဆဲလ်)


အတွေးအခေါ်ပညာ၏ ပြဿနာများ(ဘာသာပြန်)

(ဘာထရန်ရပ်ဆဲလ်)

အခန်း(၂) ဒြပ်ဝတ္ထု၏တည်ရှိမှု

 

အခုအခန်းမှာကျနော်တို့တွေဒြပ်ဝတ္ထုဆိုတဲ့အရာဘယ်လိုနားလည်မှုမျိုးနဲ့မဆိုရှိမရှိပြန်မေးကြရပါမယ်။(စားပွဲကို) ကျနော်မကြည့်ပဲနေတဲ့အချိန်မှာတောင်မှသူ့ပင်ကိုသဘာဝအရကိုတည်ရှိတဲ့စားပွဲဆိုတာရှိရဲ့လား… ဒါမှမဟုတ်(ကျနော်မြင်နေရတဲ့စားပွဲဟာ) အတော်ကြာညောင်းလှတဲ့အိပ်မက်ရှည်ကြီးတခုထဲမှာတွေ့နေရတဲ့စားပွဲပဲလား၊ကျနော်စိတ်ကူးယဉ်လိုက်တဲ့အိပ်မက်စားပွဲတလုံးလား…။ဒီမေးခွန်းဟာတော်တော်ကြီးကိုအရေးကြီးပါတယ်။အရာဝတ္ထုတွေဟာကျနော်တို့အတွေ့အကြုံနဲ့ကင်းပြီးသီးခြားရပ်တည်နိုင်ခြင်းရှိမရှိသေချာမသိနိုင်ရင်ကျနော်တို့နဲ့သီးခြားကင်းကွာပြီးဖြစ်တည်နေကြတဲ့တခြားလူတွေရဲ့ခန္ဓာကိုယ်ဖြစ်တည်မှုကိုလည်းမသေချာနိုင်တော့ပါဘူး။အဲ့ဒါဆိုရင်အဲဒီ့လူတွေရဲ့စိတ်တွေတည်ရှိမှုကလည်းပိုလို့တောင်မသေချာတော့ပါဘူး။ဘာလို့ဆိုတော့ကျနော်တို့ဟာသူတို့ရဲ့ခန္ဓာကိုယ်တည်ရှိမှုကိုအမှီပြုသုံးသပ်ပြီးသူတို့ရဲ့စိတ်ရှိတယ်လို့မှမတွေးဘူးဆိုရင်ကျနော်တို့အတွက်သူတို့မှာစိတ်ဆိုတာရှိပါတယ်လို့ယုံကြည်စရာအကြောင်းမရှိတော့လို့ပါပဲ။အခုလိုကျနော်တို့ဟာအရာဝတ္ထုတွေရဲ့ကျနော်တို့နဲ့သီးခြားကင်းကွာပြီးဖြစ်တည်နေမှုတွေကိုမသေချာဘူးဆိုရင်ကျနော်တို့ဟာကန္တာရတခုမှာအထီးကျန်ချထားခံရကုန်ပါလိမ့်မယ်။အဲဒီ့ကန္တာရမှာပြင်ပကမ္ဘာတခုလုံးဟာအိပ်မက်တခုပဲဖြစ်နေပြီးတော့ကျနော်တို့ပဲအဲ့ဒီမှာထီးထီးကြီးရှိနေသလိုဖြစ်ကောင်းဖြစ်နေပါလိမ့်မယ်။ဒါဟာစိတ်မသက်သာစရာကောင်းတဲ့ဖြစ်နိုင်ချေကြီးဖြစ်နေပါတယ်။ဒါပေမယ့်ဒီဖြစ်နိုင်ချေကလုံးလုံးကြီးမှားနေပါတယ်ဆိုပြီးတိတိကျကျသက်သေမပြနိုင်ရင်တောင်မှဒါကြီးကိုမှန်ပါတယ်လို့ယုံကြည်စရာအကြောင်းတစက်မှမရှိဘူး။ဘာလို့အဲ့လိုဖြစ်နေရတာလဲဆိုတာကိုကျနော်တို့ဒီအခန်းမှာဆက်ကြည့်ကြရပါမယ်။

 

ကျနော်တို့ဟာသံသယဖြစ်စရာကောင်းတဲ့ဒြပ်ဝတ္ထုတွေအကြောင်းမစတင်ခင်အနည်းနဲ့အများပုံသေတွက်လို့ရမယ့်အချက်တချို့ကနေစဖို့အဲဒီ့အချက်တွေကိုရှာကြည့်ကြရအောင်…။ကျနော်တို့ဟာစားပွဲရဲ့ရုပ်ဝတ္ထုပိုင်းဆိုင်ရာဖြစ်တည်မှုကိုသံသယရှိနေတယ်ဆိုပေမယ့်လည်းကျနော်တို့ဟာစားပွဲရှိပါတယ်လို့တွေးထင်စေတဲ့အာရုံခံစားမှုဆိုင်ရာအချက်အလက်တွေကိုတော့သံသယမရှိကြပါဘူး။ဆိုလိုတာကကျနော်တို့ဟာစားပွဲကိုကြည့်နေဆဲကာလမှာမြင်ရတဲ့အရောင်နဲ့ပုံသဏ္ဍန်ကိုသံသယမရှိကြသလို၊ကျနော်တို့စားပွဲကိုထိတွေ့ဖိနှိပ်လိုက်တဲ့အခါမှာခံစားရတဲ့မာကြောတဲ့ခံစားမှုကိုသံသယမရှိကြပါဘူး။အခုလိုစိတ်ပိုင်းဆိုင်ရာခံစားမှုတွေလိုဖြစ်နေတဲ့အချက်တွေကိုကျနော်တို့မေးခွန်းထုတ်မှာမဟုတ်ပါဘူး။တကယ်တမ်းပြောရရင်တခြားဘယ်လိုအကြောင်းအရာတွေကပဲဖြစ်ဖြစ်သံသယဖြစ်စရာကောင်းနေပစေအနည်းဆုံးကျနော်တို့ရဲ့လက်ငင်းအာရုံခံစားမှုအတွေ့အကြုံကရတဲ့အချက်အလက်တွေကတော့လုံးဝသေချာနေသလိုဖြစ်နေပါသေးတယ်။

 

ခေတ်သစ်အတွေးအခေါ်ပညာကိုဦးဆောင်စတင်ခဲ့သူဖြစ်တဲ့ဒေးကား(၁၅၉၆-၁၆၅၀)ဟာအခုခေတ်မှာပါအကျိုးရှိရှိဆက်ပြီးအသုံးချနိုင်လောက်မယ့်စနစ်တကျသံသယထားတွေးခေါ်ပုံတမျိုးကိုလမ်းဖောက်ခဲ့ပါတယ်။သူကသူရှင်းရှင်းလင်းလင်းနဲ့ထင်းထင်းကြီးဟုတ်ကြောင်းမှန်ရာမသိမြင်နိုင်တဲ့အရာမှန်သမျှကိုမယုံဘူးလို့သံန္နိဋ္ဌာန်ချထားခဲ့ပါတယ်။သူကိုယ့်ဟာကိုယ်သံသယထားကြည့်လို့ရတဲ့ဟာမှန်သမျှကိုသံသယထားလို့ရစရာအကြောင်းရှာမတွေ့တဲ့အထိသံသယထားကြည့်ဖို့ဒေးကားကဆုံးဖြတ်ထားခဲ့ပါတယ်။ဒီလိုတွေးပုံမျိုးကနေသူ့အတွက်တဖြည်းဖြည်းသိသာထင်ရှားလာခဲ့တဲ့အချက်ကတော့သူ့အတွက်အသေအချာစိတ်ချနိုင်တဲ့တည်ရှိမှုဟာသူ့ရဲ့တည်ရှိမှုသာဖြစ်တယ်ဆိုတဲ့အချက်ပါပဲ။သူကသူ့ရဲ့အာရုံခံစားမှုတွေမှာအဆုံးအစမရှိပေါ်လာနေတဲ့အိပ်မက်ထဲကပုံရိပ်ယောင်ပြေးတွေလိုအစစ်အမှန်မဟုတ်တဲ့အရာတွေကိုလာပေါ်အောင်လုပ်နေတဲ့လှည့်စားတတ်တဲ့မကောင်းဆိုးဝါးတကောင်ရှိနေတယ်လို့စိတ်ကူးယဉ်ကြည့်ခဲ့ပါတယ်။ဒီလိုမကောင်းဆိုးဝါးတကောင်ရှိနေဖို့ဆိုတာမျိုးဟာအတော်ကိုဖြစ်နိုင်ချေနည်းတယ်ဆိုပေမယ့်လည်းဖြစ်နိုင်ချေရှိနေသေးတဲ့အတွက်အာရုံခံစားမှုတွေကနေရတဲ့အချက်အလက်အတွေအပေါ်မှာသံသယထားဖို့ဆိုတာကလည်းဖြစ်နိုင်သွားပါတယ်။

 

ဒါပေမယ့်ဒီနေရာမှာဒေးကားဆိုတဲ့လူတယောက်ရှိနေတာကိုသံသယထားကြည့်ဖို့ကတော့ဘယ်လိုမှမဖြစ်နိုင်ဘူး။အကြောင်းကတော့သူသာမရှိရင်လှည့်စားတတ်တဲ့မကောင်းဆိုးဝါးအတွက်လှည့်စားစရာအရာလည်းရှိမှာမဟုတ်တော့လို့ပါပဲ။သူဟာသံသယရှိနေတယ်ဆိုကတည်းကသူရှိနေလို့ပါပဲ။ဆိုလိုတာကသူ့မှာဘယ်လိုအာရုံခံစားမှုတခုခုမဆိုရှိနေတယ်ဆိုရင်သူ့ရဲ့တည်ရှိမှုဟာရှိကိုရှိနေရမယ်ဆိုတာပါ။ဒါ့ကြောင့်သူ့ရဲ့တည်ရှိမှုဟာသူ့အတွက်လုံးဝသေချာသွားတဲ့အချက်တခုဖြစ်သွားပါတယ်။ “ငါတွေးထင်တယ်၊ဒါ့ကြောင့်ငါရှိနေတယ်” လို့ဒေးကားကဆိုခဲ့ပါတယ်။ဒီလိုဆိုပြီးတဲ့အခါမှတော့ဒေးကားဟာသူအခုလိုရရှိလိုက်တဲ့အခြေခံသေချာမှုကိုအမှီပြုပြီးသူ့ရဲ့သံသယထားတဲ့စဉ်းစားပုံကြောင့်ဖရိုဖရဲဖြစ်ကျန်ခဲ့တဲ့ပြင်ပကမ္ဘာနဲ့ဆိုင်တဲ့အသိကိုပြန်လည်တည်ဆောက်ဖို့ကြိုးစားပါတယ်။ဒေးကားဟာ (အဆုံးစွန်)သံသယထားတဲ့နည်းနာကိုရှေ့ဆောင်ပြီးတကိုယ်ရည်ပုဂ္ဂလနဲ့တိုက်ရိုက်ဆက်စပ်နေတဲ့အရာတွေကသာအသေချာဆုံးဆိုတာကိုပြပြီးအတွေးအခေါ်ပညာကိုအများကြီးကျေးဇူးပြုခဲ့ပါတယ်။အခုလိုပြဆိုခဲ့တဲ့နည်းနာနဲ့အချက်တွေကြောင့်ပဲသူ့ရဲ့အတွေးအခေါ်တွေဟာအတွေးအခေါ်ပညာလိုက်စားသူကျောင်းသားအားလုံးအတွက်အသုံးတည့်နေသေးတာပဲဖြစ်ပါတယ်။

ဒါပေမယ့်ဒေးကားရဲ့အဆိုဖြစ်တဲ့ “ငါတွေးထင်တယ်၊ဒါ့ကြောင့်ငါရှိနေတယ်” ဆိုတဲ့အဆိုကိုတော့သတိထားပြီးသုံးရပါမယ်။ဒီအဆိုကိုအခိုက်အတန့်တခုထက်ပိုပြီးထပ်ခါထပ်ခါပြောမယ်ဆိုရင်သူ့ရဲ့သေချာမှုဟာအကန့်အသတ်ရှိလာပါတယ်။မနေ့တနေ့ကကျနော်နဲ့ဒီနေ့ရှိနေတဲ့ကျနော်တို့ဟာလူတယောက်တည်းအတူတူပါပဲလို့သေချာတွက်ဆကြည့်လို့ရပုံရသလိုဖြစ်ပြီးဒါဟာသေချာပါတယ်ဆိုတာလည်းယူဆပုံတခုခုအရကံသေကံမပြောလို့ရပါတယ်။ဒါပေမယ့်လည်းတကယ့်ကိုယ့်ရဲ့တည်ရှိမှုသေချာအောင်ပုံဖော်ကြည့်တဲ့နေရာမှာလည်းတကယ့်စားပွဲရဲ့တည်ရှိမှုကိုသေချာပြောလို့ရဖို့ခက်သလိုမျိုးပဲခက်နေပါတယ်။(ဆိုလိုတာက) တကယ့်ကိုယ့်ရဲ့တည်ရှိမှုဟာအတွေ့အကြုံတခုခုအရလုံးဝသေချာသိသာပေါ်လွင်နေမှုမျိုးကင်းမဲ့နေသလိုဖြစ်နေပါတယ်။ကျနော်စားပွဲကိုကြည့်ပြီးစားပွဲရဲ့အရောင်အညိုရောင်သန်းမှုကိုမြင်တယ်ဆိုတဲ့နေရာမှာချက်ချင်းသေချာလိုက်တဲ့အချက်ဟာငါအညိုရောင်ကိုမြင်နေရတယ်ဆိုတာမဟုတ်ပဲ၊အညိုရောင်ဟာမြင်ခြင်းခံလိုက်ရတယ်ဆိုတဲ့အချက်ဖြစ်ပါတယ်။(မြင်ခြင်းဖြစ်စဉ်မှာမြင်ခြင်းဟာငါဆိုတဲ့ကိုယ့်ရဲ့တည်ရှိမှုကိုတိုက်ရိုက်အမှီမပြုပဲအရောင်နဲ့အလင်းပြန်မှု၊မျက်လုံး၏အလင်းနှင့်အရောင်တို့ကိုလက်ခံနိုင်စွမ်းအပေါ်တွင်တိုက်ရိုက်အမှီပြုခြင်းကိုရပ်ဆဲလ်ကပြောလိုခြင်းဖြစ်ဟန်တူပါသည်။။ဘာသာပြန်သူ) အခုဖြစ်စဉ်မှာဆိုရင်တစုံတခု (ဒါမှမဟုတ်တစုံတယောက်) ဟာအညိုရောင်ကိုမြင်လိုက်ခြင်းဆိုတဲ့ဖြစ်စဉ်တခုရှိနေတယ်ဆိုတာငြင်းစရာမရှိပါဘူး။ဒါပေမယ့်ဒီဖြစ်စဉ်မှာပါနေတဲ့အညိုရောင်ကိုမြင်လိုက်ပါတယ်ဆိုတဲ့တစုံတခု(တစုံတယောက်)ဟာတည်မြဲနေတယ်လို့အတော်အတန်ပြောနိုင်တဲ့ကျနော်တို့ “ငါ” လို့ကိုယ့်ဟာကိုယ်ခေါ်နေတဲ့တည်ရှိမှုနဲ့တထပ်တည်းအလိုလိုကျမနေပါဘူး(ဆိုတာကိုမြင်ဖို့လိုပါလိမ့်မယ်)။ဒီဖြစ်စဉ်မှာချက်ချင်းသိသာတဲ့သေချာမှုကိုရှာပြီးဒါကိုပဲထပ်ကြပ်မကွာသာလိုက်ကြည့်မယ်ဆိုရင်အညိုရောင်ကိုမြင်လိုက်ပါတယ်ဆိုတဲ့တစုံတရာဟာအခိုက်အတန့်တခုလောက်သာတည်ရှိလိုက်တဲ့အရာဖြစ်ပြီး (ကျနော်တို့ “ငါ” လို့ခေါ်နေတဲ့အရာက) နောက်ထပ်အခိုက်အတန့်တခုမှာတွေ့ကြုံရတဲ့အာရုံခံစားမှုတခုခု(အတွေ့၊အမြင်၊အကြားစသည်)ရလိုက်တဲ့တစုံတရာ(တစုံတယောက်)နဲ့တထပ်တည်းမဖြစ်တော့တာဖြစ်ချင်ဖြစ်နေပါလိမ့်မယ်။

ဒါ့ကြောင့်ကျနော်တို့ရဲ့အခိုက်အတန့်တခုမှာပေါ်လိုက်တဲ့အတွေးနဲ့ခံစားမှုတွေဟာအကြမ်းစားဆန်ပြီးသဘောမျှသာရှိတဲ့သေချာမှုရှိတယ်လို့ပြောရမှာဖြစ်ပါတယ်။ဒီလိုပြောနိုင်မှုဟာသာမန်သိမြင်နားလည်လိုက်မှုတွေမှာမှန်ကန်သလိုအိပ်မက်တွေနဲ့ထင်ယောင်ထင်မှားဖြစ်မှုတွေနဲ့ပတ်သက်လာရင်လည်းမှန်ကန်နေပါတယ်။ကျနော်တို့အိပ်မက်မက်တယ်၊ဒါမှမဟုတ်သရဲတစ္ဆေတကောင်ကိုမြင်တယ်ဆိုရင်ကျနော်တို့ရလိုက်တာသေချာတယ်လို့ကိုယ့်ကိုယ်ကိုယ်ထင်ကြတဲ့အာရုံခံစားမှုတခုခုကိုရကိုရကြပါတယ်။ဒါပေမယ့်ဒီလိုအာရုံခံစားရမှုတွေဟာ (အိပ်မက်သို့မဟုတ်သရဲတစ္ဆေမြင်ခြင်းကနေရှိတယ်လို့ထင်ရတဲ့) တကယ့်ဒြပ်ရှိအရာဝတ္ထုတွေအရပေါ်လာရတာမဟုတ်ပါဘူးဆိုတာကိုတခုမကတဲ့အကြောင်းပြချက်တွေအရကိုရှင်းနေပါတယ်။ဒါ့ကြောင့်ကျနော်တို့ရဲ့ပုဂ္ဂလိကအတွေ့အကြုံကရတဲ့အသိရဲ့သေချာမှုဟာအခုလိုချွင်းချက်အခြေအနေတွေလိုဖြစ်နေတဲ့(အိပ်မက်နဲ့သရဲတစ္ဆေမြင်ရခြင်း)တွေမှာတောင်မှတကယ့်ဒြပ်ရှိအရာဝတ္ထုတွေမရှိပဲလက်ငင်းအသိသေချာမှုကိုခံစားနိုင်တဲ့အတွက်ကြောင့်ကျနော်တို့ရဲ့ပုဂ္ဂလအသိရဲ့သေချာမှုဟာဒြပ်ရှိအရာတွေရှိမှုသာလျှင်ပေါ်နိုင်တယ်လို့ကန့်သတ်ထားတဲ့အခြေအနေမျိုးတောင်ရှိမနေတာကိုတွေ့ရမှာဖြစ်ပါတယ်။ဒါ့ကြောင့်ဒီလိုအသိတွေကိုသုံးပြီးကျနော်တို့ရဲ့အသိပညာရှာမှီးမှုမှာအခုနေရာကစပြီးထည့်တွက်ဖို့သင့်တဲ့ခိုင်မာတဲ့အသိအခြေခံတွေကိုရပြီလို့ပြောနိုင်ပါပြီ။

Advertisements

Leaving a comment

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s